Asia Miles遇积分大盗 「不了了之」当了事杜游珍


2020-06-06


阿珍最近收到旧同事报料,指身边频频有朋友畀人偷咗Asia Miles 嘅飞行里数。「黑客入侵」事件其实一月头已经见咗报,阿珍心谂: 旧闻一则,做乜依家先嚟大惊小怪!谁不知旅游组同事都话有朋友同样中招!事隔咗成个月,报纸之前又「大大只」标题话警方已经拉人,咁究竟依家搞边科?见事态严重,梗係要帮手搞清楚来龙去脉啦!

据旧同事所讲,朋友A喺今个月5号发现兑换清单里面多咗项交易,一个大陆人( 凭名推断)用咗佢成4万分嚟换张由北京飞温哥华嘅机票。咁都不特止,个强国人仲跟手改晒佢所有联络方法, 好似电邮地址同电话咁, 唔係咁「翘」留意到就真係神不知,鬼不觉喇!大嗱嗱成4万分,即係消费咗8万蚊先储到㗎喎!A梗係「擒擒青」报警同通知返Asia Miles 公司,点知原来对佢地嚟讲已经唔係咩新鲜事,仲话最近持续收到好多类似嘅案例,不过就先旨声明唔会发电邮提醒会员。阿珍听到就嬲,咁大规模嘅个人资料洩漏,依家摆明係「衾」得就「衾」,刻意隐瞒嘅啫!

追溯返篇新闻,原来警察拘捕咗嗰4个,都只不过係帮手接赃套现嘅「卒仔」,至于幕后嘅内地主脑嗰阵就写「正在追缉」。过咗一个月,当大家对于「盗用里数」嘅记忆日渐丢淡,以为件事已经告一段落啦,但实情係单新闻无咗下文咋!个积分大盗睇嚟都仲係「逃之夭夭」,各位千祈唔好掉以轻心啊!

PS. 霸气同事教路,如果飞行里数离奇消失,而Asia Miles电话却接驳到2046都係「 未能接通 」,咁就要「 单刀直入 」寄封电邮畀主席,第2日啲积分就会「 原封不动 」咁返番晒嚟!

Asia Miles遇积分大盗 「不了了之」当了事杜游珍

延伸阅读:燃油减费一啖砂糖 港人硬食「机场建造税」 @杜游珍



上一篇:
下一篇: